“…..മയക്കം വരാതെ മാനത്തു കിടക്കുന്നു
മധുമാസ സുന്ദര ചന്ദ്രലേഖ
താനേ തിരിഞ്ഞും മറിഞ്ഞും …….
”
ഇയർ ഫോണും തിരുകി ബാബുക്കയുടെ സംഗീതത്തിൽ എവിടെയോ അലഞ്ഞു കൊണ്ടിരുന്ന മനസ്സ് പെട്ടെന്നാണ് യാഥാർഥ്യ ബോധത്തിലേക്ക് വന്നത്.
ബസിൽ അടുത്തിരിക്കുന്ന ചേട്ടൻ സമയം ചോദിച്ചതാണ്. ‘ഇങ്ങേർക്ക് വല്ല കാര്യമുണ്ടോ?’ എന്നാലോചിച്ചോണ്ട് പോക്കറ്റിൽ നിന്ന് ഫോൺ എടുത്തു കഴിഞ്ഞപ്പോഴാണ് ഓർത്തത് .
‘അല്ല ചേട്ടന്റെ കയ്യിൽ ഫോണില്ലേ ,അതിൽ ക്ലോക്ക് ഇല്ലേ ,പിന്നെ എന്തിനു …വൈ ? ബട്ട് വൈ ?’ എന്റെ മൈൻഡ് വോയിസ് പുള്ളി കേട്ടു കാണണം .ഫോൺ സ്വിച്ച് ഓഫ് ആയി പോയി എന്ന് പുള്ളി പറഞ്ഞു .
“സെവൻ തേർട്ടി ..” ഒറ്റ വാചകത്തിൽ ഞാൻ മറുപടി ഒതുക്കി .
വീണ്ടും സ്പോട്ടിഫയ് വഴി ബാബുക്കയിലോട്ട് എത്താം എന്ന് കരുതിയപ്പോഴേക്കും അടുത്ത ബോംബ് പൊട്ടി .
ബാംഗ്ലൂർ ട്രാഫിക് ആണ് പുള്ളിയുടെ ഇപ്പോഴത്തെ പ്രശ്നം .
ഓഹോ …ആയ്കോട്ടെ ..ഇനി ഞാനാ ഇയർ ഫോൺ ഒന്ന് കുത്തട്ടെ , എന്റെ കണ്ണുകൾ കേണപേക്ഷിച്ചു !
പറ്റില്ല .ബാംഗ്ലൂരിൽ ചൂട് കൂടുതലാണത്രെ ഇത്തവണ. സംഭവം ശെരിയാണ് .പക്ഷെ അതിനു ഞാൻ ഇപ്പോ ജപ്പാനിൽ നിന്ന് മേഘങ്ങളേ കൊണ്ട് വരണോ എന്നാലോചിക്കുമ്പോൾ ദാണ്ടെ അടുത്ത ഐറ്റം .
ഇന്ത്യയിലെ IT കമ്പനികൾ മുഴുവനും പൂട്ടാൻ പോവുകയാണത്രെ . എന്റെ പോക്കറ്റിലെ ടാഗ് ശ്രദ്ധിച്ചിട്ടുണ്ടായിരുന്നെന്നു തോന്നുന്നു അങ്ങേരു .അല്ലേലും തുക്കടാ BMTC ബസിൽ ഇയർ പ്ലഗ് ഇട്ടു ഷോ കാണിക്കാണെങ്കിൽ നമ്മൾ IT ക്കാര് തന്നെ ആയിരിക്കണമല്ലോ. ‘ദാറ്റ്സ് എ നോ ബ്രേയിനർ ‘ എന്റെ മൈൻഡ് വോയിസ് പെട്ടെന്ന് IT ക്കാരന്റെ ചീപ്പ് ആംഗലേയത്തിലോട്ടു അപ്ഗ്രേഡ് ആയി .
പുള്ളി അപ്പോഴേക്കും നാടെവിടെ വീടെവിടെ എന്നൊക്കെ ചോദിച്ചു .കേരളം എന്ന് കേട്ട പാടെ ആലപ്പുഴയും ഹൌസ് ബോട്ടും ഇടുക്കി ഗോൾഡും പ്രകൃതി രമണീയതയും കള്ള വാറ്റുമൊക്കെ ആയി വിഷയം . ഈ ഐറ്റം മുൻപെവിടെയോ കേട്ടിട്ടുണ്ടല്ലോ എന്ന് ആലോചിച്ചപ്പോഴേക്കും പുള്ളി പ്രധാന വിഷയത്തിലോട്ടു കടന്നു . ആ എനിക്കും ഇതാണ് ഇഷ്ടം . ചുമ്മാ നീട്ടികൊണ്ടു പോവാതെ പരിപാടി പെട്ടെന്നു തീർക്കണം .അതെന്തായാലും .
സംഗതി സിമ്പിൾ ആണ് .പുള്ളി പഴയ IT കൂലി തൊഴിലാളിയായിരുന്നു ( ഇപ്പോഴത്തെ എന്നേ പോലെ ). ഒരു ദിവസം പുള്ളിക്ക് ബാത്ത് ടബ്ബിൽ കുളിച്ചോണ്ടിരുന്നപ്പോ യുറേക്ക യുറേക്ക എന്ന് അലറി വിളിക്കാൻ തോന്നി .
കുളി കഴിഞ്ഞു പുറത്തിറങ്ങിയപ്പോഴേക്കും പുള്ളിക്ക് മനസ്സിലായി , ഇങ്ങനെ പോയാൽ പറ്റില്ല . ബിസിനസ് ചെയ്യണം .വാണിജ്യ വ്യവസ്ഥിതി കീഴടക്കണം .അംബാനി ആവണം . ആരും സഞ്ചരിക്കാത്ത വഴികളിലൂടെ ഒരു പ്രാന്തനെ പോലെ സഞ്ചരിക്കണം. ലിസ്റ്റ് നീണ്ടു പോകുന്നതിനിടയിൽ പുള്ളിയൊന്നു തുമ്മി .
തല തോർത്തി രാസനാദി പൊടി ഇട്ടപ്പോഴേക്കും (നോക്കണ്ട കുറേശ്ശേ തള്ളിയില്ലെങ്കിൽ എനിക്ക് ഒരു സമാധാനമുണ്ടാവില്ല ,അതോണ്ടാ ) ക്ലോസ് ഫ്രണ്ടിന്റെ മെസ്സേജ് വന്നു. തികച്ചും യാദൃശ്ചികം . “എടാ , ഒരു ബിസിനസ് ഓപ്പർച്യൂണിറ്റി ഉണ്ട് .കഫെ കോഫി ഡെയിലോട്ടു വാ ”
അമ്പട കേമാ സണ്ണി കുട്ടാ ….ഇപ്പോഴല്ലേ എനിക്ക് കാര്യം പിടി കിട്ടിയത് .ഇറങ്ങേണ്ടത് ബെലന്തൂർ ആയിരുന്നെങ്കിലും ഞാൻ പെട്ടെന്നു തീരുമാനം മാറ്റി . ആളിറങ്ങാനുണ്ട് ആളിറങ്ങാനുണ്ട് …എന്ന് കന്നടയിൽ കൂവി . എന്നിട്ട് ആ ചേട്ടനോട് ഒരു ബൈ പറഞ്ഞു ജീവനും കൊണ്ട് കണ്ടം വഴി ഓടി .
— ശുഭം —
Ha ha. That was fun. Nicely written.👍 Recently we have got unnecessary gyan from a person in temple here who even showed family pics,told salary blah blah blah.. Ayal oru tsunami 🌊 aayirunu.
LikeLiked by 2 people
It’s strange at times. That too when you are finding some time for yourself in the traffic , that really irritates me a lot 😅
LikeLiked by 2 people